Stefano Ninni é orixinario de Schiavi di Abruzzo, un pequeno concello de montaña da rexión italiana de Abruzzo, con pouco máis de 900 habitantes. Vive en Galicia dende hai máis de vinte anos, pero segue mantendo moi viva a memoria oral da súa infancia, que tamén lle transmite aos seus dous fillos, xa nacidos en Galicia (por certo, é pai dunha das nosas alumnas máis brillantes, Valeria Ninni).
Contounos unha tradición que protagonizan os nenos na noite de Nadal. Recollen leña polo día e de noite todo o pobo congrégase ao redor de grandes fogueiras que prenden nas partes máis altas da vila. Dáse unha especie de competición por ver que barrio ten as fogueiras máis grandes, pero en realidade, é unha maneira de estar xuntos e divertirse en comunidade.
Hoxe en día, a tradición mantense pero con menos participación de xente, pois a zona, igual que a montaña galega, sofre un importante despoboamento polo éxodo da xente moza a cidades coma Nápoles, Milán ou Roma.
Agardemos que poida manterse viva moitos anos, pois parécenos unha tradición moi fermosa
Traballo realizado polas alumnas Paula Franco, Ariadne Mesejo e Nidia Iglesias.
